有日有位小姐嚟到診所。
佢同我講：「登記呀」
我：「好呀，麻煩你俾身分證我呀」
佢望望診所四周：「要等幾多個呀？」
我望望大堂，冇其他人喎。
我：「下個到你啦」
佢：「即係等幾多個呀」
…這是IQ題嗎？
我：「冇其他人等緊呀，登記完等一陣就可以入醫生房啦」
佢：「一陣係幾耐呀？我趕時間呀因為」
你趕時間就唔好咁多嘢問，快啲俾身分證我登記啦。
我：「好快咋，你俾身分證我登記先啦，要登咗記先可以入去見醫生」
佢：「醫生唔會好多嘢問呀可？」
一定唔夠你多。
我：「都係問你邊度唔舒服多嘅啫」
佢：「即係好快呀？」
我：「你俾身分證我登記先呀」
佢：「登記好我要等幾耐先有得入去呀？」
我：「幾分鐘啦」
佢：「幾分鐘即係五分鐘呀？」
我：「差唔多啦」
佢：「五分鐘即係幾耐呀？有啲耐喎，我可能趕唔切喎」
喺非洲每60秒就有一分鐘過去，你五分鐘即係300秒。你不如都係走啦，走會快啲呀。
我：「你俾我登記咗先啦，我哋喺度就咁講都講咗幾分鐘啦」
佢望望錶：「哎！係喎！最衰都係你咁多嘢問，我趕唔切啦！」
佢轉身飛快離開診所。
一定係我多嘢問啦…
Search